Ný teoría

Endurupptökunefnd hefur skilað niðurstöðu.
Mælt er með endurupptöku á dómum vegna aðildar að tveimur mannshvörfum. Beiðni um endurupptöku á dómum vegna rangra sakargifta er hafnað.

Hugmynd Endurupptökunefndar um málið virðist því vera eftirfarandi:

 

Maður hverfur í Keflavík. 19 ára gamlir krakkar lesa um mannshvarfið í fjölmiðlum eins og aðrir. En sinna  að öðru leyti  sínum daglegu hugðarefnum og hversdagslegu heimilishaldi eins og gengur og gerist. Fylgjast af áhuga með íslenskri kvikmyndagerð, fara í bíltúr og skreppa í bíó einstaka sinnum, taka mömmu stundum með. En samkvæmt nýrri útgáfu Endurupptökunefndar sem nú er komin fram, héldu þau engu að síður fund með manni, jafnaldra sínum, heima hjá honum á Grettisgötu. Þar tóku þau saman ráð sín um að ef þau yrðu einhverntíma handtekin vegna þessa mannshvarfs sem þau komu hvergi nærri og höfðu engar hugmyndir um fremur en aðrir, þá skyldu þau bera sakir á fjóra menn en játa þó jafnframt sakir á sig sjálf. Gestgjafinn á fundinum skyldi þó í byrjun aðeins nefna einn af fjórmenningunum. Þessi áætlun skyldi framkvæmd af þeim öllum í einu, 43 dögum eftir að þau yrðu handtekin og sett í einangrun.     

Annaðhvort trúum við þessu, eða við endurupptökum einnig mál stúlkunnar og finnum haldbetri skýringar á tilurð hinna röngu sakargifta.

TH

Athugasemdir

[Snorri Páll (IP-tala skráð) 24.2.2017 kl. 15:55]

Hárrétt og satt - eins og venjan er á þessari góðu síðu.

[Johann Bogason (IP-tala skráð) 24.2.2017 kl. 20:00]

Það er vissulega hörmulegt að þessar örvæntingarfullu fabúlasjónir ungrar móður skulu núna metnar með jafn kaldrifjuðum hætti, þegar öllum sæmilega skynugum mönnum má vera ljóst að allur þessi skelfilegi umbúnaður var sköpunarverk lögreglumanna.

En Erla getur staðið stolt eftir sem áður. Hlutur hennar vex en þeirra smækkar.

jsb