Erla Bolladóttir

 

Erla, góða Erla - ráðvillt stelpa eða kaldrifjað glæpakvendi?

 

Nafn Erlu Bolladóttur tengist umdeildasta sakamáli Íslandssögunnar sem hefur heltekið þjóðina áratugum saman. Ýmsar sögusagnir hafa gengið um hver væri hinn raunverulegi sannleikur í Guðmundar- og Geirfinnsmálinu en enginn virðist hafa komið til botns í því. Sögusagnirnar ganga enn.

Erla var bendluð við þetta flókna og dularfulla mál en henni var haldið heillengi í yfirheyrslum, þar til hún vissi ekki sjálf muninn á sínum vitnisburði og þess sem hún var sökuð um. Var hún þjófur, dópisti, Júdas, morðingi? Eða var hún ráðvillt stelpa sem leiðst hafði á glapstigu, og sagði hvað sem var til að fá aftur að vera með barninu sínu?

Erla, góða Erla er sjálfsævisaga og uppgjör Erlu Bolladóttur en tvítug að aldri var hún umtalaðasta og fyrirlitnasta kona landsins. Óli blaðasali kallaði nafn hennar í Austurstræti og mynd af henni birtist á forsíðum dagblaðanna. Dimmur skuggi Guðmundar- og Geirfinnsmálsins vofði yfir henni hvar sem hún fór og dró hana að lokum niður í hyldýpi eymdarinnar hinum megin á hnettinum.

En hver er þessi umtalaða kona? Í bókinni kynnast lesendur bakgrunni Erlu og uppvexti, aðdraganda sakamálsins og eftirköstum; um æsku, afbrot og móðurhlutverk. Saga hennar spannar þrjár heimsálfur – Erla gat ekki hafst við hér á landi. Henni tókst að gera upp við sjálfa sig, horfast í augu við eigin bresti og snúa við blaðinu en það er ekki fyrr en nú sem hún er tilbúin að hrista af sér skugga fortíðarinnar og segja sögu sína.

Þetta er saga um örvæntingu og vonir. Von til þess að þekkja sjálfan sig og lifa farsælu lífi. Ennfremur er þetta saga um leit að réttlæti. Bókina tileinkar Erla dætrum sínum þremur þar sem hún segir: „Ég á mér þá ósk að þeirra bíði samfélag sem beri gæfu til að þroska með sér skilning á merkingu hugtaksins réttlæti.“

 Vaka-Helgafell gefur út.

Viðtal við EB í Kastljósi 02.11.08:

http://dagskra.ruv.is/streaming/sjonvarpid/?date-from=2008-11-02

Athugasemdir

[Guðni Már Henningsson, 9.11.2008 kl. 13:28]

Þessa bók ætla ég að lesa...

[Jenný Anna Baldursdóttir, 9.11.2008 kl. 14:38]

Les þessa, auðvitað.

[Pálmi Gunnarsson, 9.11.2008 kl. 23:20]

Erla Bolladóttir er kjarnakona. Einn svartasti blettur á annars vel blettóttri réttarfarssögu lýðveldisins eru rannsóknin, réttarhöldin og dómarnir í hinum svokölluðu Geirfinns og Guðmundar málum. Ekkert afsakar þann réttarglæp, ekkert annað en endurupptaka málsins og í framhaldi sakaruppgjöf blásaklauss fólks bætir að einhverju leyti fyrir þann glæp.

Pálmi Gunnarsson

[Valdís Stefánsdóttir (IP-tala skráð) 10.11.2008 kl. 07:07]

Ég las þessa bók í vikunni og var algerlega gáttuð á aðferðum rannsóknarmanna í öllu ferlinu. Það var ekki aðeins brotið á henni og hinum á allan mögulegan hátt heldur var hún leidd áfram í yfirheyrslum með lygum og vísbendingum sem síðan var spunnið úr þar til hún trúði sjálf að hún hefði framið þessa glæpi. Það er margt sem kemur þarna fram sem ég vissi ekki. Erla skýrir vel frá þessu og dregur heldur ekkert undan sinn hlut. Þetta er þörf lesning.

[Guðrún Magnea Helgadóttir, 2.1.2009 kl. 12:19]

Og verdur eitthvad framhald a rannsoknum vardandi Geirfinnsmalid nuna eftir uppljostrun Erlu?  Eda verdur jatning hennar latin naegja til ad folk sjai ad ofbeldi logreglu a hendur Saevars Cicielski var mannrettindabrot af grofustu gerd og ta i framhaldinu, ad domur Haestarettar 22. 02.1980 var ut ur ollu korti?

Verdur eitthvad frammhald a malinu og tad a endanum, upplyst?